23/02/2014 15:40:42

Vllaznia dhe Partizani ndajnë nga një pikë

Partizani dhe Vllaznia kanë ndarë nga një pikë në ndeshjen që përfundoi përpara disa minutash, e luajtur në orën 13:00 në stadiumin 'Loro Boriçi'

HermesNews - Nën një numër të madh shikuesish nisi pjesa e parë, me Vllazninë në kërkim të pikëve të vlefshme për të siguruar mbijetesën, që pas rezultateve të fundit është vënë në dyshim. Ndërkohë edhe të kuqtë vinin në këtë sfidë për fitore, për të ruajtur hapin e Skënderbeut kryesues. Rastin e parë në portë e krijojnë miqtë nga Tirana, të cilën provojnë më anë të Memellit, por pogradecari nuk arrin të jetë deçiziv në tentativën e tij. Ndërkohë, me kalimin e minutave dhe vendasit rrisin lojën e tyre dhe fillojnë të shohin nga porta, por pa arritur të krijojnë raste konkrete, kjo edhe për shkak të mungesës së qetësisë dhe të nervozizmit të shumtë. Në minutat e fundit të pjesës së parë shkodranët krijojnë raste të tjera, dhe në njërin prej tyre Bushiç mund të kishte shënuar, por gjuajtje e tij është e dobët. Në pjesën e dytë loja ndizet, dhe pavarësisht se minutat e para sjelin një lojë përgjithësisht të dobët për shkodranët, është Vllaznia që krijon rastet më të mira. Në mesin e pjesës së dytë ndërkohë, të kuqtë kalojnë në inferioritet numerik, teksa arbitri kryesor Remzi Sadiku, jep një karton të verdhë për Ibrahimin, karton që duhet riparë. Ibrahimi e kishte një të tillë dhe si pasojë e lë ekipin e tij me dhjetë lojtarë. Kur mendohej se kartoni i kuq do i hapte punë Partizanit, janë demat e kuq që shënojnë. Mazrekaj merr një top nga Memelli, lëviz bukur në hyrje të zonës dhe gjuan duke e dërguar topin në trekëndëshin e portës së mbrojtur nga Vujadinoviç, duke shtangur tifozët kuqeblu. Nuk vonon kundërpërgjigja e vendasve, të cilët gjejnë menjëherë golin e barazimit, me anë të Vukçeviç, që nga brenda zonës gjuan fortdhe mposht portierin Alban Hoxha. Pas golit, nis dominimi i Vllaznisë, teksa janë shkodranët që në harkun e dhjetë minutave krijojnë aq sa nuk krijuan gjatë të gjithë ndeshjes. Fillimisht është i sapofuturi në lojë Dibra që vë në provë Hoxhën, por portieri i kuq përgjigjet në mënyrë fantastike, duke shpëtuar portën nga një gol i sigurtë. Në aksionin pasardhës është sërish Dibra që provon por gjuajtja e tij shkon jashtë, ndërsa në minutën e parë shtesë është Hajdari që me një gjuajtje me kokë nga pranë zonës së vogël, e dërgon topin mbi traversë duke shpërdoruar një rast të artë për ti dhënë fitoren kuqebluve. Ndërkohë, dy minutat e fundit është momenti i Krajës, i cili fillimisht merr një top dy metra larg portës, por nuk arrin të koordinohet dhe të gjuajë, duke shpërdoruar një mundësi të artë shënimi. Ndërkohë, në minutën e fundit të ndeshjes, është sërish mbrojtësi që shpërdoron një mundësi të artë, teksa pas një topi të dhënë me kokë nga Hajdari, i vetëm me portierin gjuan mbi kuadrat, duke humbur një rast për ti dhënë trepikëshin Vllaznisë. Me këtë barazim, Vllaznia humbet sërish terren, dhe tani e shikon veten të rrezikuar seriozisht. Ndërkohë, mund të quhet provë pozitive ajo e Partizanit, i cili morri një pikë në një fushë të vështirë si ajo e Shkodrës dhe tani pret në shtëpi kampionët.

Vllaznia – Partizani 1-1

Stadiumi “Loro Boriçi”, Ora 13:00

Shënues: Vukçeviç 78’ / Mazrekaj 69’

Vllaznia: Vujadinoviç, Gocaj, Vukçeviç, Boci, Kraja, Tafili (Shtubina 62’), Bardulla (Nikoliç 77’), Kruja (Dibra 77’), Sykaj, Bushiç, Hajdari

Trajner: Agim Canaj

Partizani: Hoxha, B. Krasniqi, G. Krasniqi, Rrahmani, Ibrahimi, Antanasijeviç, Murati, Demiri (Oladele 90’), Dunkoviç (Nexhipi 60’), Mazrekaj, Memelli (Hyshmeri 77’)

Trajner: Marcio Sampaio

Gjyqtarë: Remzi Sadiku, E. Demiraj, O. Grabova

Kartona të verdhë: Boci, Shtubina

Kartona të Kuq: Ibrahimi (2V). Na ndiqni dhe në Facebook dhe Twitter

Arbër Meçenovi

Dërgo me email | Stampo artikullin